About transcription

Folketeljinga 1825 for Jølster

Originalen til folketeljinga 1825 for Jølster er å finne i Jølster prestearkiv, Statsarkivet i Bergen. Same boka som inneheld teljinga frå 1825 har og med teljinga for 1835. Presten har nytta listeen frå teljinga i 1825 til å føre eit slags "folkeregister" fram mot 1835, d.v.s. han har lagt til endringar, dødsfall, utflytting, nye born. Dette er teke med i den databasen som vert lagt ut her.

Teljinga vart ved kongeleg resolusjon 11. oktober 1825 sett til første søndag i advent, 27. november. Instruksen som vart gjeven i eit sirkulære 20. oktober var felles for byane og landdistrikta.

Denne gongen skulle det takast med opplysningar frå kvart einskild hus i byane og i frå kvart einaste skyldsett bruk på landsbygda. Husmannsplassar som ikkje var skyldsette skulle førast saman med den garden dei høyrde inn under. Dei trong ikkje vera namngjevne på lista, men antalet skulle vera med. Likevel er ofte matrikkelgarden den minste teljeeininga, medan det er meir skjeldsynt at kvart einskild gardsbruk er ført opp.

Personane skulle reknast til det huset der dei hadde sitt natteleie og faste opphald. Ein person som var bortreist for ein kortare eller lengre periode skulle teljast på heimstaden, men folk som ikkje var fastbuande vart ikkje registrerte.

Denne databasen er laga av Egil Øvrebø hausten 1999.

Sjå elles om folketeljingar.