Sonnev Lurås
Sonnev arbeidar dagleg som hjelpepleier på ein avdeling for demente i heimbygda si, og har jamt bruk for den lokalhistoriske kunnskapen sin i samtaler med dei som bur der.
Eg heiter Sonnev Lurås, er 45 år og er vokse opp i Austbygde i Tinn, Telemark, eg har to born, Ingvild og Torgrim og ein finsk lapphund Ilo.
Slekt og lokalhistorie har eg hatt stor interesse for sidan eg var i tenåra, Gome mi (bestemor) fortalde mykje frå dagleglivet da ho var ung. I næraste familie har me alltid vore opptatt av slekt, lokalhistorie og historie generelt, og me har alltid snakka mykje om dette i omgangskretsen. På ungdomskula hadde eg ein lærar Sigmund Holte, som er ein kjend lokalhistoriker i Tinn. Eg har deltatt på fleire kurs i gotisk skrift der han var lærar og han stiller alltid opp når eg treng hjelp og han er ein stor inspirasjon.
Eg er også med i Lure historielag, og har vore med å bidra til å gje ut bøkene: «Rosesaumarane frå Austbygde og Tessungdalen» og «Folkekunst i Tinn, Kunstnarbrørne frå Myljom-Luraas»
Gamle dokumenter, brev og liknande er ei skattekiste for meg. Eg er veldig takknemleg for alle frivillige som gjer at eg kan leite fram i alt som ligg digitalisert. Da var det naturleg for meg å melde meg som frivillig til å transkribere for digitalarkivet når eg fekk anledning til det. Det er min måte å gje noko tilbake på. Det går ikkje ein einaste dag utan at eg på ein eller annan måte held på med anten slekt eller lokalhistorie. Det gjev meg stor glede!