Folketeljingane 1815-1855

I tidsrommet 1815-1855 vart det utført folketeljingar kvar tiande år. Trass i at desse teljingane var numeriske, finst det teljingslister med namngjevne personar for enkelte område og år. Arkivverket har starta ein dugnad for å gjere om teljingslister med namngjevne personar til søkbare data. Det gjer at alle brukarar av Digitalarkivet kan søke etter opplysningar, til dømes namn eller fødselsår.

Du treng ingen særskilde forkunnskapar for å bidra til denne dugnaden, men det er viktig at du følgjer rettleiinga under. Viss du har spørsmål knytt til det å bidra eller til sjølve registreringsarbeidet, kan du be andre bidragsytarar om hjelp i forum for kjelderegistrering, eller du kan kontakte Digitalarkivet.

Finn eit område du vil registrere

I denne fila finn du oversyn over kva område som ikkje er registrerte (eller reserverte) enno: Status for folketeljingane 1815-1855 (i pdf-format)

Send ein melding via vårt kontaktskjema FØR du startar slik at me unngår at fleire registrerer same område.

Her finn du dei skanna folketeljingane i Digitalarkivet:

Folketeljinga 1815 i Digitalarkivet (skanna)

Folketeljinga 1825 i Digitalarkivet (skanna)

Folketeljinga 1835 i Digitalarkivet (skanna)

Folketeljinga 1845 i Digitalarkivet (skanna)

Folketeljinga 1855 i Digitalarkivet (skanna)

Slik registrerer du

Du kan nytte det verktøyet du er komfortabel med til arbeidet, men det er viktig at verktøyet er eigna til å strukturere dataa i kolonner/felt og rader/poster. Mange syns at til dømes Excel fungerer godt til dette arbeidet, men Digitalarkivet kan ta i mot dei fleste filformat. Kontakt Digitalarkivet dersom du treng hjelp til å lage eit strukturert oppsett for ei teljingsliste.

Det er viktig at du gjer deg kjent med og følgjer registreringsrettleiinga

Teljingslistene kan vere ulike, men generelt vil det vere viktig å registrere:

• stad (prestegjeld, fogderi, sokn, teljingskrets og liknande)
• bustad (namn og eventuelt nummer)
• alle namngjevne personar og opplysningar om dei (alder, yrke, familiestilling, sivilstatus med meir)
• bileteID som koplar registrerte data til det skanna biletet (les her om korleis du registrerer bileteID)

Legg elles merke til:

• viss det berre er hovudpersonen og eventuelt kona som er namngjevne medan resten av hushaldet berre er talde, er det ikkje naudsynt å leggje inn tomme radar/postar for personar som ikkje er namngjevne. Skriv heller ein merknad.

• fleire hushald på same gard skal skiljast. Dette gjer du ved å enten nummerere hushalda fortløpande, eller ved å markere kvart nye hushald (kvar nye hovudperson) med talet 1. Dei andre personane i hushaldet skal då ikkje ha noko tal i feltet for hushald.

Det kan vere nyttig å gjere seg kjent med HISTFORM-standarden før du tek til å registrere. Her vil du til dømes finne informasjon om forkortingar som vert nytta i søkbare folketeljingar.

Om HISTFORM-standarden

Forkortingar i søkbare folketeljingar.

Send inn dine registrerte data

Når du er ferdig med å registrere eit område, sender du inn arbeidet ditt via vårt kontaktskjema.